PANLALAGLAG NI JOMA SISON SA CPP, NAAAMOY NA

Hindi na mapagkakaila ni Jose Maria Sison, kilalang lider ng Communist Party of the Philippines, na nawawalan na ng tapang ang kaniyang liderato sa nasabing partido. Maituturing kasing malaking pruweba ang biglang pagkabig ni Joma mula sa dati nitong paninindigan laban sa pakikilahok sa eleksyon sa bansa. Matatandaan na tahasang kinutya ni Joma ang desisyon ng Partido Komunista ng Pilipinas na iwan ang armadong pakikibaka (armed struggle) at sumabak sa parliamentary struggle noong 1957, isang desisyon na ayon mismo kay Sison ay ang naging mitsa ng tuloy-tuloy na pagbagsak at pagkawasak ng nasabing organisasyon at ang tinuturong dahilan sa likod ng pagkalas ng ilang miyembro sa pangunguna ni Sison at upang sila ay magbuo ng isang bagong partido – ang CPP at ang NPA.

Kung ating susuriin ang mga napapabalitang huling mga pangyayari sa loob ng CPP tulad ng nangangamoy na awayan sa pagitan ni Sison at mag-asawang Benito at Wilma Tiamzon at mga binitawang salita ni Joma patungkol sa bagong tatag na MAKABAYAN ay makikita natin na siya ay napilitan lamang na kumabig mula sa nauna niyang desisyon hingil sa eleksyon. Dahil maugong ang pagkademoralisa sa hanay ng mga armadong NPA particular na ang mga taga Visayas at Mindanao at ang pagkampi ng mga ito kina Benito at Wilma Tiamzon ay minarapat ni Joma na humanap ng ibang paraan upang makabawi at ibang taong makakapitan.

Dito ngayon pumapasok si Bayan Muna Representative Satur Ocampo na matapos makaramdam ng tamis ng tagumpay sa nakaraang mga tatlong party list elections at makapamuhay ng marangya bilang isang kongresista ay ngayon naghahangad naman ng mas mataas na pwesto sa gobyerno bilang senador. Upang maisakatuparan ang planong pagkandidato sa pagkasenador ay nagtutulak ngayon si Satur ng isang agrisibong paraan na pinabasbasan mismo kay Joma Sison - ito ang pagbuo ng isang koalisyon na tinatawag na MAKABAYAN na intensyonal na liligaw at kukuha ng suporta ng mga kilalang TRAPO sa ating bansa.

Ngayon, ano ang pakinabang ni Joma sa pagpalit ng naunang paninindigan patungkol sa eleksyon at upang pumayag ito na mabuo ang MAKABAYAN? Ang pagtulak ng tinatawag na parliamentary struggle ay pwedeng magdulot ng isa sa dalawang bagay lamang para kay Sison. Una, marahil ay nakita at gustong gayahin ni Joma ang pagpupunyagi ng Communist Party of Nepal na ngayon ay nakaupo bilang dominanteng partido sa Nepalese Parliament at pwedeng magpabulusok din sa matagal nang rebolusyong inilunsad ng CPP. Pangalawa, ito ay kaniyang ginawa upang resolbahin ang kaniyang malalim na problema sa Partido laban sa mag-asawang Tiamzon at ginagamit niya ang eleksyon upang maging mitsa ng pagbagsak ng CPP tulad na lang nang sinapit ng PKP noong 1957.