KIMAY’S DEATH SAD TRUTH OF REDS’ YOUTH EXPLOITATION

Walang pinagkaiba ang kamatayan ni Kemberly “Kimay” Jul Luna sa porsyento ng mga kabataan na nilulumpo ng nakakahibang na druga o di kaya’y walang kabuluhang hazing. Kung iisipin mas kahindik-hindik pa. Buhay ng isang promising youth ang nalagas para sa pulang bandila na hinaharian ni Jose Maria Sison. Nakikibaka ang tulad niyang mga kabataan hindi para sa demokrasya, kung hindi para palitan ito ng Komunistang diktadorya kung saan maghahari lang ang iilan. Ang nakakalungkot pa, isa si Kimay sa mga kabataang nabulag sa kapangyarihan ng armas.

Ang bulok na pananaw ng kaliwa ang tanging dahilan ng pagkamatay ng promising youth na si Kimay. Walang dapat ipagbunyi sa nasayang na buhay ng dalaga. Naaatim ng NPA na mag-recruit ng menor de edad o di kaya’y kabataan sa kanilang grupo habang patabaing-baboy ang mga lider nito sa labas ng bansa tulad nina Sison. Ang taong nagpasimuno sa Komunistang pagkilos, nagsasaya sa immunity nito sa labas ng bansa.
Anong ehemplo ang naisabuhay ni Ka Kimay? Rebeldeng tinalikuran ng taong pinaglalaban niya? Ang maging isa sa mga armadong nanloloob sa mga kawawang sibilyan kapalit ng bigas o pera? Ano ang ikinaiba ng buhay ni Kimay sa mga pusakal na nagtatago sa bundok, may armas at pumapatay. Anong demokrasya ba ang pinaglaban niya?

Kung nailagay sana sa tama ang husay ni Kimay hindi lang kapiranggot na mensahe sa dyaryo ang naging deskripsiyon ng buhay niya. Ito ang ehemplo ng exploytasyon sa NPA. Sa ganitong paraan nakakalikom ang NPA ng mga kabataang gagamitin nitong buhay na bulletvest sa mga bakbakan. Sa kasamaang palad nag-eendorso pa ang NPA na pamarisan ng iba pang kabataan si Kimay. Ang mamatay sa madugong pakikidigma para sa kapakanan ng ibang nakahilata ay hindi kailanman magiging tama.

KIMAY, GINAMIT NG NPA SA KANILANG PROPAGANDA

Ayon sa pambansang bayani na si Jose Rizal, ang kabataan ay pag-asa ng bayan. Ang mga katagang ito ay nagsisilbing inspirasyon sa karamihan lalo na sa mga kabataan dahil tumatatak sa kanilang isipan na sila ang magsisilbing gabay upang magkaroon ng malawakang pagbabago sa pamamalakad sa bansa. Kung kaya, malimit na nakikita ang mga kabataan at estudayante na nagtitipon-tipon sa kalsada upang marinig ng gobyerno ang mga hinaing nila sa isyung kinahaharap ng bansa ngayon. Ngunit alam ba nila talaga kung ano ang kanilang pinaglalaban? O nauto na lamang sila ng mga tao o grupong sadyang sumasalungat sa gobyerno?

Ang pagkamatay ni Kemberly “Kimay” Jul Luna na isa sa mga kabaatang miyembro ng New People’s Army (NPA) ay binigyang parangal ng Communist Party of the Philippines (CPP) dahil sa kanyang pakikibaka sa murang edad. Bago pa man masali sa NPA, si Kimay ay kabilang sa “iskolar ng bayan” at nag-aaral sa Mindano State University-Iligan Institute of Technology (MSU-IIT). Ngunit nasayang ang ibinigay sa kanyang pagkakataon na makatapos sana ng pag-aaral dahil sa kanyang pagtalikod sa pag-aaral at pag-anib sa Partidong Komunista. Marahil, sa tamis ng pananalita at mga huwad na pangako ng mga taong nagrekruta ay nabulag si Kimay sa ideolohiya ng partido kung kaya hindi na niya kinailangan ang edukasyon.

Ang pangyayaring ito ay lubusang inabuso ng CPP dahil nagbigay daan ito upang makahikayat ng mga kabataan na umanib sa kanilang samahan. Ang pagkawala ni Kimay ay walang nagawang mabuti sa kanyang sarili at pamilya niya mismo. Ang NPA lamang ang nakinabang sa pagkamatay ni Kimay dahil ginamit nila ito bilang isang propaganda upang madagdagan ang kanilang puwersa sa pamamagitan ng paghihikayat sa iba pang kabataan para umanib sa kanilang kilusan.

Tama ba ang isinusulong na ideya ng CPP at NPA? Inaatasan nila ang mga kabataan, estudyante at propesyunal na sumali sa kanila upang mabigyan ng hustisya ang nangyari kay Kimay. Humihina na nga ba ang kanilang puwersa kung kaya ginagamit pa nila ang kamatayan ni Kimay para sa kanilang pansariling interes? Wala naman sanang masama sa kanilang pinaglalaban ngunit patuloy naman ang kanilang armadong pakikibaka na nagdudulot ng kapahamakan hindi lamang sa buhay ng mga rebelde at sundalo kundi pati na rin sa mga inosenteng mamamayan nakapaligid sa kanila. Ito ba talaga ang gusto nating kahinatnan ng mga kabataang pag-asa ng ating bayan?